Celebráronse as primeiras Xornadas de Radio na Biblioteca Escolar en Santiago, organizadas por Bibliotecas Escolares de Galicia, e nós tivemos a sorte de participar nelas co alumnado que forma parte da Radio na Biblio.
A xornada comezou cun obradoiro a cargo de Cristina Collazo, de teatro radiofónico, que nos deixou unha fermosa reflexión: “A palabra é igual ca a imaxe… con elas voas a un mundo cheo de fábulas e contos… só tes que poñerlle voz!”. Durante o obradoiro tamén nos falou de diferentes técnicas para mellorar a articulación, a pronunciación e a expresión oral.Rematamos o obradoiro creando un conto dando o toque teatralizado coa voz. Foi unha experiencia moi enriquecedora.
Grazas, Cristina!
A continuación, asistimos a varias entrevistas realizadas dentro do espazo radiofónico, nas que participaron persoas como a presentadora Esther Estévez, a piragüísta Teresa Portela ou Miguel Ángel Cajigal. Todos/as destacaron a importancia de ler, de investigar previamente a traxectoria da persoa entrevistada, de saber escoitar e do valor do traballo en equipo, principios que ás veces tenden a perderse, pero que desde a nosa biblioteca temos moi presentes e queremos seguir fomentando.
Ademais, foi unha oportunidade magnífica para convivir e compartir experiencias con alumnado doutros centros, enriquecendo aínda máis esta xornada tan especial arredor da radio e da biblioteca escolar.
.png)
.png)
